Lúinn!

Litli karlinn okkar fór í 5 mánaða skoðun í gær og þar fengum við það staðfest að Sveinn Gauti stefnir "hátt". Hann er 71 cm... sem sagt algjör lengja. Hann var frekar lúinn eftir mælingu og sprautu og fékk sér lúr í bílnum. Er hann ekki yndislegur?

Loksins fleiri myndir af Svenna og vinkonum:)

Margt hefur gerst síðan myndir af Sveini Gauta voru birtar hér síðast. Hann hefur verið að ganga í gegnum mikið þroskaferli; ...missti hárið, fékk fyrsta páskaeggið, byrjaði á sundnámskeiði og svona mætti lengi telja. Nei sennilega er þetta að mestu allt upptalið. En við sjáum samt mikin mun á honum, hann er svo mannalegur og alveg ótrúlega gaman að spjalla við hann því hann sýnir svo mikil viðbrögð. "Svarar" okkur með hjali, brosir náttúrulega og hlær endalaust, nú eða orgar smá ef honum mislíkar eitthvað. Hann er byrjaður á ungbarnasundnámskeiði hjá Erlu vinkonu en hún er náttúrulega best í heimi og ég held að Sveini Gauta finnist notalegt að þekkja kennarann sinn. Alla vega finnst foreldrunum það æði:) Gummi á afmæli á morgun svo Sveinn Gauti og móðir hans ætla að finna einhverja gjöf á gamla genginu. Mér finnst svo dásamlega sniðugt hvernig allir auglýsa ALLT á gamla genginu í dag. Kannski við kaupum bjór fyrir pabba á gamla genginu. Íslenskan bjór... haha. Jæja, en hér koma myndirnar, þær eru teknar í mars þegar Edda Úlfsdóttir New York dama var stödd á landinu og þau skelltu sér ásamt Kristínu Sædísi út á galeiðuna. Lunch á Sólon varð fyrir valinu og mömmurnar og Þórey ofurfrænka fengu að fljóta með.


Hér eru feðgar að hvíla sig í sófanum með bangsa.


Sveinn Gauti og Kristín Sædís leiðast á Sólon. Þarna eru þau enn að bíða eftir matnum. (Held reyndar að hann treysti á að geta hangið í Stínu sinni því honum finnst svo erfitt að sitja í svona stól)


Edda Úlfsdóttir hin fagra situr bein í baki í barnastól en hún er orðin 6 mánaða þegar þessi mynd er tekin, mikill reynslubolti.


Sveinn Gauti og mamman.



Kristín Sædís að spá hversu lengi hún þarf eiginlega að bíða eftir matnum.


Edda og Stína að slúðra.


Edda og Svenni.

Gamlar myndir

Afsakið letina! Ég veit að tótlutjattarar koma hér fyrir Svein Gauta núorðið en ég ætla að breyta til og setja hér inn tvær gamlar myndir sem eru teknar þegar við Gummi vorum ungt og barnlaust par. Nánar tiltekið sumarið 2006. Man ekki hvort þessar hafi áður verið á síðunni en þær eru teknar í Kuala Lumpur, Malasíu þegar við vorum á heimleið frá Sydney og fórum í frábæran fuglagarð. Ég hugsaði mikið til vinkvenna minna, Söndru og Daggar þann dag en þær eru með fuglafóbíu. Mér finnst þessar myndir bara frekar fyndnar og þetta var góður dagur svo ég ákvað að henda þeim hér inn.

Greiðslan og grænmetið.

Sveinn Gauti er að fara úr hárum en það er samt ótrúlega sítt svo hann getur bara greitt yfir skallann. Yfirleitt stendur hárið út í allar áttir eins og sjá má á þessum myndum. Okkur fannst hann bara eins og brjálaður lítill Einstein um daginn þegar hann var alveg óhuggandi (of þreyttur) og hárgreiðslan magnaðist við uppnámið sem hann kom sjálfum sér í.



Hann fær smá graut tvisvar á dag og finnst það ágætt. Hann fær hins vegar ekki lengur AD dropa því fólkið í Apótekinu segir að þeir séu uppseldir á landinu!!! Ótrúlegt... ég hélt að svona gerðist ekki. Þannig að ef litli Sveinninn minn fer að sjá úr fókus þá er það af því að sá sem græjar AD dropa ofan í íslensk ungbörn misreiknaði sig í innkaupunum. Á skírdag fékk snáðinn að smakka örlítið af grænmetismauki og fannst það greinilega svakalega sniðugt. Það er reyndar eiginlega alltaf svona gaman hjá okkur:) víííí.

Hitt og þetta

Sveinn Gauti hlær að skrýtlu sem Kristín Sædís sagði honum.



Kristín Sædís, Sveinn Gauti og Emilía Helga að leika.



Við Sandra skelltum okkur á gönguskíði um helgina. Það var frekar skrautlegt og duttum við báðar á bossann. Gummi hélt sig við slalomið og Sveinn Gauti lét vagninn duga. Honum fannst notalegt að kúra þar og kann vel við fjallaloftið.



Eftir 8 mánuði verður Sveinn Gauti 1 árs svo ég er byrjuð að æfa mig í bakstrinum. Keypti bók á Amazon með uppskriftum úr hinu heimsfræga Magnolia bakaríi í NYC (ekkert slor fyrir afmælið hans Svenna míns) og svo stóð ég sveitt í gær og í morgun að baka og baka cupcakes alveg á fullu. Litríkar eru þær og myndu sóma sér vel í barnaafmæli, en OJJJJ hvað þær voru vondar!!! Magnolia er frægt fyrir cupcakes eins og sannir Sex and the City aðdáendur vita en ég þarf eitthvað að prófa mig áfram og gá hvort ég hafi lesið uppskriftina vitlaust. Mér fannst þetta bara vera dísæt smjörklessa. Kannski eg fái fleiri til að dæma:)

Þegar Sveinn Gauti er ekki að leika við vini sína eða í Bláfjöllum fer hann til dæmis á Sólon með ömmu og mömmu (eða það gerði hann í dag), kaffi Gló í Laugardalnum (fór þangað á föstudag) eða hefur það notalegt heima hjá sér.

fleiri myndir

myndir

Herra Ísland var skírður fyrir hálfum mánuði. Áttum yndislegan dag hérna með fjölskyldunni heima í Fífuhvammi.

Svenni og vinkonurnar.

Sveinn Gauti á margar góðar vinkonur. Því miður man ég ekki alltaf eftir því að taka myndir þegar hann hittir þessar dömur en hér koma nokkrar. Sumar myndanna eru frá því hann Sveinn var mjög ungur. Laaaangt síðan.


.Vala að dást að Sveini Gauta.


Sveinn Gauti með frænkum sínum, Diljá Eir og Össu Ólafsdætrum:)


Glænýr með Elsu


Þórey og Svenni að knúsast:)


Þórey og Edda Úlfsdóttir (Herdísardóttir) að spjalla við Völu og Mola.


Sveinn Gauti og Herdís


Með Þórhildi frænku.

Berrassaður Moli...

Sveinn Gauti

Við Sveinn Gauti biðjum afsökunar á því hversu langt er síðan við settum inn myndir síðast. Vonandi eru aðdáendurnir ekki mjög sárir.

Mömmuknús

Arg, hún er aftur farin að knúsa mig!


HJÁLP!

Jógi gúrú.

Við mæðginin erum byrjuð í jóga. Hann liggur slakur á dýnu á meðan móðirin puðar og erum við bæði sátt við þetta fyrirkomulag. Þó hann slaki á í mömmuleikfiminni þá er hann duglegur að æfa sig að halda haus og sér pabbinn að mestu um þær æfingar.




Eins og aðrir var Svenni litli ansi brúnaþungur þegar við horfðum á leikinn í gær og hann lokaði meira að segja augunum. Ég held að Alfreð þjálfari hafi verið í skinny jeans svo ég lokaði líka augunum!



Að lokum vil ég nefna að mér finnst að það eigi að rífa gamla ljóta kofa í miðbænum og byggja þar hugguleg hús sem passa inn í umhverfið. Magnað að fólk skuli vera að missa svefn yfir því að þessi hreysi eigi að fjúka. Magnað!

Moli á mannamótum

Þá hefur það verið ákveðið að Moli heitir Sveinn eins og föðurafinn. Held að afanum hafi ekki fundist það leiðinlegt:) ...enda er það alls ekkert leiðinlegt. Hlýtur bara að vera þrælskemmtilegt að eignast svona yndislega krúttlegt og dásamlegt barnabarn sem er svo þar að auki nafni manns. Ég er svo sem ekki hlutlaus:)

Sveinn Moli (annað millinafn verður nánar auglýst síðar) fór ásamt móður sinni á kaffihús í síðustu viku og hitti þar Kristínu Sædísi vinkonu sína sem var þar stödd með mömmu sinni Söndru. Þau voru voða góð bæði tvö. Á fimmtudagskvöldið fór hann svo í kvöldkaffi með mér til Þóreyjar og þar voru fleiri vinkonur hans, þær Edda Úlfsdóttir (Herdísardóttir) og Emilía Helga (dóttir Erlu) en myndir úr því partýi koma síðar.

Moli Marley

Þegar það liggur illa á Mola, hann er t.d. reiður eða þreyttur finnst honum best að hlusta á Bob Marley og vanga við mömmu sína. Þá kemst hann strax í gott skap. Reyndar sofnar hann yfirleitt um leið:)







Myndirnar eru kannski ekki í bestu gæðum og reyndar ekki í fókus en það er smá panikk hérna þegar maður reynir að ná brosmynd því ungi maðurinn brosir ekki eftir pöntunum.

Maður ársins!

Maður ársins 2007 hefur verið valinn! Dómnefndin hér í Fífuhvammi hefur komist að niðurstöðu ...má ég kynna Mola:



Jólin komu og fóru, við fögnuðum fæðingu frelsarans á klassískan hátt; skreyttum, átum, opnuðum gjafir og nutum þess að vera með vinum og ættingjum. Sonurinn tók mikinn kipp og mældist 60 cm á lengd í 6 vikna skoðuninni í morgun! Hann fór líka í sína fyrstu pössun 29.des þegar Guðrún og Daði gengu í það heilaga og við fögnuðum þeim áfanga með þeim. Amma og afi á Háaleitisbraut dekruðu við nýliðann á meðan við foreldrarnir fórum í dásamlegt brúðkaupið.



Hér eru þeir feðgar að knúsast á jólanótt heima í Fífuhvammi. Við byrjuðum kvöldið á Vatnsenda þar sem var elduð rjúpa fyrir dekurrófuna mig (NB ég bað ekki um það enda borða ég næstum hvað sem er, það er bara hugsað svo rosalega vel um mig). Því næst héldum við til systu og co þar sem ég er vön að halda jólin og varð bara að fá minn skammt af þeim:) Að lokum fórum við heim í okkar kot og héldum hér litlu jól á náttfötunum eins og Ameríkanar.



Gamlárskvöldi vörðum við hjá mömmu og pabba og sonurinn svaf öll lætin af sér. Skaupið fór bara nokkuð vel í okkur... þó pabbi hafi sennilega verið sá eini sem hefur séð LOST. Mér finnst annars sniðugt hvað þjóðin tekur skaupið alltaf nærri sér. Held að mín kynslóð sé enn á því að skaupið '85 hafi verið það besta (kommon við vorum 5 ára) og því er erfitt að toppa það! Það er vandlifað.