laugardagur, desember 29, 2007

Molajól


Gleðileg jól tótlutjattarar! Við fjölskyldan höfum haft það notalegt yfir hátíðarnar. Litli Molinn er reyndar kominn með hormóna eða hitabólur en það slær ekki alvarlega á fegurð hans:)

sunnudagur, desember 23, 2007

enn fleiri myndir:)

Nýr skammtur af myndum hér:) Einhver spurði hvort sonurinn væri kominn með nafn. Svarið er nei. Við höfum varla gefið okkur tíma til að ræða nöfn en höfum samt hugmyndir. Þurfum bara að velja. Við fengum skemmtilega heimsókn í dag en Vala frænka og Þórey frænka komu hingað til að dást að syninum. Honum líkar öll athygli vel svo þetta var allt saman mjög huggulegt.






miðvikudagur, desember 19, 2007

"Gracias a la vida...

...que me ha dado Moli."

Loksins loksins, ný mynd af Molanum mínum. Allt að verða vitlaust í kommentum og Bryndís, klikkaða tían í Madrid farin að vitna í Joan Baez (svo ég gerði hið sama í fyrirsögn með ögn breyttu sniði) og ég veit ekki hvað og hvað. Takk elsku lesendur fyrir að láta vita af heimsókn ykkar hingað á síðuna mína. Það hefur komið mér mjög skemmtilega á óvart að sjá hverjir hafa ratað hingað inn og þið trúið ekki hversu mikið það gleður mig og hvetur mig að sjálfsögðu til að skrifa nokkur orð oftar. No worries, ég geri mér grein fyrir því að þið eruð hér fyrir Molamyndirnar en ekki bullið í mér svo við skulum vinda okkur beint í þær:

Ég kom að þeim feðgum svona í fyrradag, þeir voru að leggja sig. Það er ekki mikið jólastress á þessum bæ:)


Þessi mynd er ekkert spes af Mola en æðisleg af stóra frænda hans, Steingrími Degi sjóræningja. Moli er svo heppinn að vera ríkur af frábærum frænkum og frændum sem hann á eflaust eftir að líta upp til.


Þarna er sonur minn að lesa bók í rúminu svona eins og sannir nautnaseggir gera í jólafríinu. Músin Molly fylgist með en það sést reyndar bara í búkin á henni. Mér finnst skugginn af honum skemmtilegur á þessari mynd, minnir mig á Pétur Pan (takið eftir nefinu) en ég hef alla tíð verið mjög skotin í Pétri Pan:)

fimmtudagur, desember 13, 2007

Rauð jól?


Ég ætla ekki að skrifa um veðrið. En samt. HVAÐ ER Í GANGI??? Húsið nötraði í nótt og ég heyrði varla eigin hugsanir fyrir látunum í veðrinu. Mér finnst vont veður reyndar alltaf pínu spennandi (svo lengi sem ekkert hræðilegt gerist) og ýtti reglulega á "refresh" takkann á mbl í von um æsispennandi fyrirsagnir á borð við "fjúkandi ruslatunna sneiddi snjókarl í tvennt". Hef mikið pælt hvernig fór fyrir öllum upplýstu snjókörlunum, jólasveinunum, Maríunum og Jesúbörnunum sem prýða nú garða landsins.

Fyllti tvær stórar krukkur af engiferkökum í gær. Húsbóndinn aðstoðaði mig smá. Hann býðst ekki til að elda eða baka af fyrra bragði en á það til að leyfa sér að koma með athugasemdir eins og "ég myndi skera sveppina öðruvísi" (ég gerði Flúðasveppasúpu í gær) eða "af hverju hefðurðu piparkökurnar svona litlar". Hmmm, betra bara að sleppa svona kommentum þegar maður situr á bossanum og fylgist með húsfreyjunni elda og baka ofan í sig. Eða bara gera þetta sjálfur:) ...en ég tók þessu svo sem ekki illa.

Læt mynd af nýliðanum okkar fylgja með. Hann sefur á daginn, vakir á nóttunni. Það sést á mér:)

mánudagur, desember 10, 2007

grúppía


Aðdáun móðurinnar leynir sér ekki:) Drengnum virðist líka öll þess athygli og aðdáun foreldranna vel og líður best nálægt okkur.

Hef brallað eitt og annað síðustu daga, eins og kaupa jólagjafir, baka, lesa og svo komst ég að því að ég er ekki skarpari en skólakrakki. Þar hafið þið það!

föstudagur, desember 07, 2007

Jólajóla!


Desember kom á sínum tíma eins og við var að búast þrátt fyrir að ég teldi mig ekki klára í slaginn. Þá er mál að skreyta og punta og því komið smá babb í bátinn. Vér hér í Fífuhvammi eigum ekki svoleiðis fínerí. Ég er reyndar mikið jólabarn en það sem er stöðvar mig er valkvíðinn. Mér finnst erfitt að finna jólaskraut. Fór í leiðangur síðustu helgi með það eina markmið að sanka að mér skrauti en kom heim með nokkra köngla og lakkrís (ekki til skrauts heldur áts). Úff. Er þó búin að baka engiferkökur og Gummi er búinn með þær. Eftir bara svona tvö ár getur hann kennt syni sínum um það, en reyndar hugsa ég að ég muni notfæra mér þetta gamla góða trix meira en Gummi... það er bara aðeins of snemmt núna. Ég er hrædd um að Gummi myndi sjá í gegnum "en það var Moli sem kláraði allar kökurnar og súkkulaðið". Við pabbi erum bæði vön að nota þetta trix en nú eru þau mamma bara tvö eftir í kotinu svo hann verður víst að viðurkenna sekt sína þegar mamma skammar hann fyrir að klára smákökurnar. Jæja, ég vona að allir séu að njóta aðventunnar og hendi hér inn einum mola:)

laugardagur, desember 01, 2007

kysstur og knúsaður


Hann fær nokkur knús daglega frá foreldrum sínum þessi. Annað er ekki hægt og það er alltaf jafnnotalegt:) Eins og sést er hann ekkert að kippa sér upp við þetta kossaflens heldur sefur bara í gegnum það.

fimmtudagur, nóvember 29, 2007

meiri Moli


Það er gífurleg eftirspurn eftir myndum af litla monsanum svo maður reynir bara að anna þessu:) Við ætlum ekki að setja upp barnalandssíðu eða eitthvað slíkt en ég set einhverjar myndir hér áfram. Lífið gengur bara vel í Kópavoginum, hann sefur og drekkur nema að á kvöldin veit hann ekki alveg hvað hann vill og ýmist drekkur eða liggur á brjóstinu mínu (steinsofandi) eins og hundur með beinið sitt, og sármóðgast ef mér dettur í hug að leggja hann frá mér. Í nótt leið honum greinilega eitthvað illa og gekk illa að sofna svo ég er ansi lúin sjálf. Við bara krossleggjum fingur og vonum að hann fái ekki hina alræmdu magakveisu eins og svo mörg börn (og báðir foreldrar hans) ...vona bara að þetta hafi verið eitthvað loft og hann hafi þurft að leysa vind:)

sunnudagur, nóvember 25, 2007

Geisp...

Í dag er litli Molinn okkar vikugamall! húrra húrra... og foreldrarnir eru enn dáleiddir að þessari fegurð og hafa ekki augun af unganum sínum:) ég vara ykkur við, þessari væmni í nýbakaðri móður lýkur ekki í bráð þannig að þeir sem eru ekki með þolinmæði fyrir meira "mússí mússí" og mont í mér geta hvílt tótlutjattið í bili því ég mun bara halda áfram að vera upptekin af honum:) ...og að setja trilljón broskalla í hverja færslu:) :) :)

fimmtudagur, nóvember 22, 2007

Halló heimur...

...hér kem ég!



Takk fyrir allar kveðjurnar:) Unginn okkar Gumma fæddist 18.nóv, 14 merkur og 51 cm og yndislegur:)

miðvikudagur, nóvember 14, 2007

Jólagjöfin í ár!

Ég las á mbl í vikunni að einhver nefnd hefði verið fengin til að velja "jólagjöfina í ár". Þessi nefnd valdi GPS tæki sem það heitasta í pakkann 2007. Puff, þau hljóta hreinlega að hafa fengið eitt slíkt tæki hvert fyrir að velja það. Ég er alls ekki sammála þessu, kannski sniðugt fyrir rjúpnaskyttur og flakkara en rosalega held ég að margir eigi eitt svona tæki í skúffunni sinni og noti það lítið. Nei ÉG skal segja ykkur hver jólagjöfin í ár er og það vill líka svo skemmtilega til að hún er mun ódýrari en GPS tæki. Haldið ykkur fast. Jólagjöfin í ár.... eeeeeeeeer.......

PUKKI BOLLYWOOD BABY
...nýjasta geislaplata Leoncie!

Skellið ykkur á eintak ef þið viljið vera viss um að ná að gleðja ástvini ykkar:)

miðvikudagur, nóvember 07, 2007

Ólöf á Indlandi!!!

Ég vil vekja athygli lesenda á nýjum link hér undir "fleiri vinir" en það er hún Ólöf Inga vinkona mín og skokkfélagi hér á árum áður sem er farin að blogga um komandi ævintýri á Indlandi. Hún er mætt í karríið og ætlar að vera þarna þangað til hún hefur fundið sér eiginmann. Nei grín. Hún er að bjarga heiminum:) ...og við ætlum að fylgjast með því. Ohhh hvað það er gott að vita að maður á svona fulltrúa í Asíu (Ólöfu) og Afríku (Arndísi Ósk) sem sjá um að bjarga heiminum á meðan við hin erum upptekin af okkur sjálfum:) Ég lagði inn á reikning Arndísar um daginn en hún stendur fyrir söfnun sem ég hef sagt áður frá. Mér finnst alltaf gaman að velta fyrir mér þeirri heimspekilegu spurningu af hverju tökum við þátt í svona söfnunum, og hjálparstarfsemi. Er það af því að við viljum virkilega hjálpa þeim sem minna mega sín? ...eða af því að það lætur okkur líða vel? ...friðar líka pínu samviskuna. Er reyndar viss um að það er blanda af þessu öllu. Ég vil virkilega koma að einhverju gagni og láta gott af mér leiða en það lætur mér líða vel með sjálfa mig í leiðinnin. Sem er kannski bara svona rúsínan í pylsuendanum og allt í góðu lagi með það. Finnst góð umræðan sem hefur verið í gangi síðustu daga um þróunaraðstoð. Að það þýðir ekkert að dæla peningum í Afríku þar sem spillingin er svo mikil. Ekki gefa fátæka bóndanum pening fyrir mjólk, gefðu honum heldur mjólkandi belju og þar fram eftir götunum. Arndís mun einmitt koma peningunum úr söfnuninni sjálf í gagnið svo þeir skila sér alveg örugglega þangað sem þeir eiga að fara. Okei, hugsum aðeins um þetta... en það er kominn matartími hjá mér. Takk.

miðvikudagur, október 17, 2007

Ekki fréttir

Hvað er að frétta? frekar fátt svo sem. Börnin bókstaflega hrúgast í kringum mig, já já meðgöngu líkur víst með fæðingu og nú eru ansi margar vinkonur orðnar mömmur. Mín meðganga gengur vel nema ég þarf að vera róleg og vinn því ekkert svo mikið.

Það er hálfgerð gúrkutíð eins og stendur hjá mér en ekki hægt að segja það sama um íslenska fjölmiðla sem hljóta að detta í það daglega til að fagna viðburðarríkum degi. Þvílíkt og annað eins drama sem hefur verið í gangi, gjörsamlega búið að grilla Villa (hann sá reyndar um það sjálfur að hluta til) og fólk nær ekki andanum af æsingi. Held reyndar að innan við 10% borgarbúa skilji þetta REI mál. Ég á í basli með það og svo finnst mér þegar talað er við "fólkið af götunni" í fjölmiðlum eins og það viti bara sjaldnast nokkuð í sinn haus. Það styður sitt lið (sama hvaða lið það er) og er skúffað og foj og ég veit ekki hvað og hvað en veit samt varla af hverju. Ég held ég sé sátt í Kópavoginum nú þegar þessir prakkarar í Rvk taka sig saman og skíta allir saman upp á hnakka. merde!

laugardagur, október 06, 2007

Húsmóðirin og börnin í Afríku.

Í dag straujaði húsmóðirin á meðan hún horfði á "How to steal a million" með Audrey Hepburn og Peter O'Toole. Setti líka í nokkrar vélar, hamaðist á ryksugunni og þannig mætti lengi telja. Aðeins um 7 vikur í að ég stækki fjölskylduna og meira en nóg eftir að gera í kotinu. Ótrúlegt hvað það safnast saman " í lokin". Mér finnst ég vera stanslaust að og samt gerist þetta hægt. Ég hreyfi mig svo sem ekkert hratt þessa dagana.

Að öðru, sem er mun mikilvægara en húsmóðurstörfin: Arndís Ósk vinkona mín (linkur hérna niðurfrá) er stödd í Namibíu þar sem hún vinnur núna í nokkra mánuði. Hún fékk þá snilldarhugmynd að fá okkur vinkonurnar í lið með sér til styrkja einhver verkefni þarna þar sem hún er stödd. Sem dæmi má nefna að á leikskólunum þarna eru ekki til nein leikföng. Nú ætlum við að leggja á reikninginn hennar smá upphæð svo hún geti sjálf farið og keypt dót handa börnunum. Hún er reyndar með ótal hugmyndir að svona verkefnum enda á nógu að taka, en mér finnst svo sniðugt að hún geri þetta þá sér maður líka í hvað peningarnir manns (sem annars hefðu jafnvel farið í bíóferð, tímarit eða bara nammi...) fara. Því miður eru flestir hættir að lesa tótlutjattið eftir að ég kom heim frá Sydney en ég vildi samt benda á þetta og vona að einhverjir sem lesa síðuna vilji líka taka þátt í þessu og geti jafnvel sagt sínum vinum frá þessu. Þið komist í samband við Arndísi í gegnum síðuna hennar og getið líka sent mér línu:) Koma svo fólk!!!! Jæja, ætla að fá mér nammi, hvort eð er búin að kaupa það:)

fimmtudagur, september 20, 2007

Suomi


Eins og svo margir reyni ég að heimsækja einn nýjan stað í veröldinni á hverju ári. Það gengur reyndar vonum framar og í raun gæti ég hætt að ferðast í nokkur ár því ég á svo marga punkta inni. En það kemur náttúrlega ekki til greina. Í vor fór ég til dæmis til Rómar og Pompei, svo tóku uppköstin við og þá fór ég ekki lengra en fram á baðherbergi svo vikum skipti en þar sem ég er löngu orðin hress var kominn tími á nýtt ferðalag og ákváðum við hjónaleysin að skella okkur til Finnlands og taka út ný heimkynni Völunnar minnar. Held þetta hafi verið ein besta hugmynd sem ég hef fengið lengi því þetta vikufrí var eins og frí gerast best. Mikil hvíld (held að metið hafi verið 12 tíma svefn), frábær félagsskapur (Vala og Aleksi, en þau voru svo höfðingleg að bjóða okkur bælið sitt), margt nýtt að sjá (hvorugt hafði komið áður til Finnlands) og nóg af bjór fyrir Gumma minn. Við leigðum bíl og keyrðum til Kristinakaupunki en Aleksi er þaðan. Gistum eina nótt á heimili foreldra hans sem hlýtur bara að vera eins finnskt og það gerist. Hreindýrahorn upp á vegg, saunakofi á lóðinni þeirra og nokkrir metrar þaðan út í vatnið (eða sjóinn ef út í það er farið). Held eg hafi sjaldan séð jafnmikla gæsahúð og þegar Gummi var að fara beint úr saununni ofan í kalt vatnið. Ég let mér nægja að horfa á enda held ég að erfinginn hefði ekki fílað svona snöggar hitabreytingar. Ahhh ég elska það þegar maður hefur góða og gilda afsökun til að sleppa við eitthvað sem maður virkilega þorir ekki að gera.

Helsinki var falleg og þægileg yfirferðar fyrir óléttu konuna sem hefði ekki fílað mannmergð stórborgar í þessu ástandi. Borgin er falleg, lítil og afslöppuð. Búðirnar voru skannaðar og stelpuhagfræðin kom sér stundum vel ("ef við kaupum meira fáum við meira í tax-free"). Fórum á sveittan finnskan veitingastað fyrsta kvöldið, þeirra útgáfa af Hard Rock Café býst ég við en í stað áritaðra mynda af Hollywood stjörnum, gullplatna og hljóðfæra var þessi staður eins og musteri Zetor traktora. Þarna voru gamlir Zetor traktorar út um allan staðinn og meira að segja zetorvörur seldar á staðnum. Við skulum orða það þannig að það hafi verið einn eða tveir finnskir hillbillar á staðnum:)

laugardagur, ágúst 18, 2007

Radio ga-ga

"Hæ, Ásgeir í tölvulistanum hér". Hmmm... hvaða útvarpshlustandi er ekki orðinn þreyttur á Ásgeiri í tölvulistanum? Ég hef lengi haft gaman af auglýsingum og pæli nokkuð mikið í þeim sem er kannski spes, eða kannski ekki svo spes. Annað dæmi um lélegar auglýsingar eru Dominos auglýsingarnar. Hræðilega illa heppnaðar allar saman! En dæmi um góðar auglýsingar sem mér finnst alltaf jafnfyndnar eru Lottóauglýsingarnar með Lýð og Glitnis maraþonauglýsingarnar. ódýrar en alltaf jafnsniðugar.

Menning
Menningartótla spókaði sig í menningarmiðborginni í dag. Veit reyndar ekki hversu menningarleg ég var í raun og veru, hitti fjölskylduna, fylgdist með hlaupinu (er það menning?), snæddi smörrebröd á Jómfrúnni með gömlu (dönsk matarmenning!), keypti tískublað í Iðu (hönnun er menning) og rölti svo upp Skólavörðustíginn. Bærinn iðaði af lífi og mér fannst þetta svo skemmtilegt að ég ætla að kíkja aftur í bæinn í kvöld. Áfram menning!

sunnudagur, júlí 29, 2007

Sumarblogg...

Þvílíkt sumar! Er ljótt að þakka fyrir gróðurhúsaáhrifin? já ég ætla að sleppa því og láta sem ég haldi að það sé hrein tilviljun hvað veðrið hefur verið dásamlegt í Reykjavík í sumar:) ahhhh. Ég er með kúlu framan á mér sem ég er orðin mjög montin af, 8 vikna samfelldri "ælupest" lauk í byrjun júní og síðan þá hef ég verið nokkuð spræk í vinnunni, svona miðað við hvernig þetta byrjaði allt saman. Í áðurnefndri kúlu býr lítill strákur sem ætlar að búa þar fram í lok nóvember. Við Gummi erum orðin mjög fullorðins hérna í Kópavogskotinu okkar og ég skelli stundum í speltbrauð þegar vel liggur á mér. Sjálfri finnst mér ég nokkuð efnileg verðandi húsmóðir. Og þó, ...lofa engu. Ég kann til dæmis ekki að nýta afganga og gera girnilegan kvöldmat úr því sem finnst í ísskápnum svona einn tveir og bingó. Mér finnst það vera nokkuð sem hver almennileg húsmóðir þarf að kunna. Mamma og pabbi voru í mat áðan. Þegar þau voru farin henti ég afganginum af kjötinu (en geymdi reyndar annað) ...ekki segja múttu!

fimmtudagur, júní 28, 2007

Kryddpíur!

Ætli nýtt Kryddpíuæði sé í uppsiglingu? Er búin að horfa nokkrum sinnum á Reuters klippuna á mbl.is þar sem þær koma saman í dag til að tilkynna heimsbyggðinni endurkomu sína. Ég bara kemst ekki yfir það hvað Victoria ofpósar alltaf. Þetta er hrikalegt, ahahaha! alveg ógeðslega fyndið reyndar, og skemmtilegast að henni skuli finnast þetta flott. Held að ekkert súpermódel myndi pósa svona svakalega í myndatöku. Ég elska Victoriu. Kjöööööt!

þriðjudagur, júní 26, 2007

Allt í drasli!

Sá byrjunina á "How clean is your house" á Skjá einum áðan og ég neyddist til að skipta um stöð. Mér varð svo flökurt... Gat alveg ímyndað mér lyktina heima hjá gaurnum. Talandi um vonda lykt (sem ég er mjög viðkvæm fyrir þessa dagana) ...ég sá á blogginu hennar Ingu Steinu að það sé bara svita og prumpufýla á Oliver þessa dagana. Er þetta satt? Geta fleiri djammarar staðfest þetta? Ojbarasta!

þriðjudagur, júní 12, 2007

Loðið

Við erum með loðna hefðardömu í pössun hér í nýja kotinu okkar á meðan fjölskyldan hennar skemmtir sér í Stóra Eplinu. Sama hvernig ég þurrka af og ryksuga og þá skilur þessi hálfpersneska dama, Skotta, eftir sig loðna slóð út um allt! Ég elska ketti en þetta er of mikið! og á þessum þremur sólarhringum hefur hún tvisvar næstum náð að stökkva fram af svölum/glugga og við búum á annarri hæð, og tvisvar hefur hún verið nálægt því að kveikja í bossanum sínum því hún vill helst sitja á eldavélinni...en þá kviknar sjálfkrafa á hellunum. Fjúff, ég verð fegin þegar ég skila henni ótjónaðri þó ég eigi að sjálfsögðu eftir að sakna hennar líka. Mjá.

föstudagur, júní 08, 2007

Paris

Eruð þið reið yfir að París hafi verið sleppt eftir þrjá daga í fangelsi? og glöð að það er búið að stinga henni inn aftur? Mér gæti ekki verið meira sama en mér finnst það reyndar alvarlegt ef það er tvöfalt réttarkerfi í BNA. Var líka að spá af hvaða heilsufarsástæðum vistinni var breytt í stofufangelsi. Fékk hún hiksta?

fimmtudagur, júní 07, 2007

Afþreying frh.

Eruð þið búin með bókina og myndina? Þá sting ég upp á perezhilton.com ...og þegar þið eruð komin með of mikið samviskubit yfir að lesa tilgangslaust amerískt slúður lesið þá Flugdrekahlauparann sem er mun gáfulegra og menningarlegra. Ég er að lesa hana núna, en stundum verð ég að leggja hana frá mér þegar ég verð of sorgmædd. Dæs.

sunnudagur, júní 03, 2007

Afþreying

Þið sem vitið ekkert hvað þið eigið af ykkur að gera á svona rigningardögum hafið um tvennt að velja: leigja "Running with Scissors" eða lesa "Leyndardómur Býflugnanna". Ég myndi gera bæði. Hef horft á nokkuð margar myndir undanfarið, og líka lesið margar bækur síðustu vikur þar sem ég hef ekki verið í ástandi til að hoppa um víðan völl og þetta tvennt situr eftir og ekki orð um það meir.

föstudagur, apríl 27, 2007

Það er komið sumar....

Þá hefur sumarið ruðst inn á landsmenn með tilheyrandi roki og rigningu og því ekki seinna vænna en að koma sér í sumargírinn; finna til sandala, sumarkóla, bermúdabuxur og brennibolta. Svo hættum við snemma að vinna á föstudögum ef við mætum á annað borð, grillum í mildri kvöldsólinni og skemmtum okkur svo úti í leikjum. Það er um margt að velja; teygjó, snú-snú, "yfir", brennó, og ein króna. Sumir vilja meira fútt annað slagið og hef ég því ákveðið að halda blautbolakeppni og leðjuslag fyrstu helgina í júní. Einungis stelpum er boðið. Það eru fjórir riðlar, A, B, C og D og geta keppendur svalað þorstanum með suðrænum kokteilum á milli atriða. Það verður útiklefi í garðinum til að skola af sér mestu leðjuna og vinda bolina. Ég lofa að aðstaða verður til fyrirmyndar; Exton sér um tækjabúnað (Gloria Estefan og Cyndi Lauper músík mun virkilega fá að njóta sín), stóra Kringlusjónvarpið mun tryggja að allir gestirnir geta fylgst með hinum keppendum og keppendur úr Herra Ísland munu hrista kokteila ofan í dömurnar. Skráning í keppnina fer fram hér á tótlutjattinu og þið hafið allan maímánuð til þess að tryggja ykkur þátttökurétt. Voilá!

mánudagur, febrúar 26, 2007

Slúðurþorsti

Hvað er fréttnæmast á Íslandi í dag? Um hvað er rætt á kaffistofum landsmanna? Er það "vonandi" lækkandi matvöruverð? Eða komandi kosningar? Tilraunir Írana með auðgun úrans? Neibb! Heitustu málin, alla vega í síðustu viku voru túristar sem okkur á svo skammarlegan hátt tókst að fæla frá landinu með afskiptasemi okkar af umræðuefninu á ráðstefnunni þeirra. Nei, bíddu við... við gerðum enn betur og beinlínis bönnuðum þeim að koma! Í þessu landi búa teprur sem halda að þær búi við málfrelsi. Annað funheitt mál var Halla síhressa og Jude sísæti. Mér finnst hann sætur, en ekki jafnsjarmerandi og hér áður fyrr þegar ég átti það til að pósta inn myndum af honum þegar ég hafði ekkert að blogga um. Barnapían var með í för á Fróni en í þetta sinn þurfti hún víst að passa börnin og mátti því ekki vera að því að skemmta Jude. Sennilega nýbarnapía líka. Sienna hefur sennilega ráðið hana þegar hún var enn með Jude. Barnapían hlýtur því að vera a)foxljót b)nunna c)klæðskiptingur.

sunnudagur, janúar 21, 2007

klúðursbloggari

Ég er alltaf að lenda í því að bloggin mín hverfa eins og dögg fyrir sólu. Ætla samt að prófa enn einu sinni. Jæja, hvar á ég að byrja?

a)Íbúðin: ég hef stritað dag og nótt við að koma íbúðinni okkar í stand. Búin að brjóta niður, hlaða og múra veggi, spartla, rífa gólfdúk og veggfóður, flota gólfin, tengja ofna, draga í rafmagnið og svona mætti lengi telja. Gummi kemur annað slagið þegar hann nennir og færrir mér kleinu og trópí, hvetur mig til dáða, fer útmeð ruslið og jafnvel sópar yfir gólfið þegar vel liggur á honum.

Fjölskyldan: allt gott að frétta af henni, búin að segja hvað Gummi er að gera (sópa gólf og kaupa trópí), mamma og pabbi eru jafnhress og alltaf en helst er það að frétta að fjölskyldan stækkaði nýlega þar sem Don Ólafur bróðir minn eignaðist son í lok nóvember. Don Junior verður skírður næstu helgi og fer athöfnin fram í Corleone.

Félagslífið: hef verið nokkuð dugleg að hitta vini mína undanfarið og er það vel. Hef líka verið dugleg að stunda kvikmyndahúsin og sá síðast "Little miss Sunshine" sem fær hjá mér 6 stjörnur af 5 mögulegum. Mér varð flökurt og fékk brjóstsviða af hlátri!!! Vissi ekki að það væri hægt. Um daginn leigði ég líka spólu. The Lakehouse. Ekki orð um það meir, laaaaaangdreeeegnaaaastaaaa mynd sem ég hef séð leeeeengi.

fimmtudagur, janúar 04, 2007

miðvikudagur, janúar 03, 2007

Ég vil óska öllum starfsmönnum Dominos pizzu gleðilegs árs og farsældar á nýju ári. Þakka viðskiptin á árinu sem var að líða. -tótla

mánudagur, janúar 01, 2007

tadaaaaa

Gleðilegt ár honnís. Ég finn það á mér að tjáningarþörf mín er öll að færast aftur í aukanna eftir annars mjög svo þögult haust svona blogglega séð og ætla bara því að henda fram hér einu stuttu bloggi. Mig langar að byrja á því að tjá mig um áramótaskaupið en ég veit samt varla hvort ég þori því, þetta er svo viðkvæmt mál. Rétt eins og pólitík og trúmál. OK, hvar á ég að byrja? Hló einhver? hmmm, ég gafst reyndar upp og fór að gera eitthvað annað (borða snakk eða pissa eða eitthvað) en ég hef ákveðið að gefa skaupinu annan séns og ætla að horfa aftur á það síðar. Að sjálfsögðu fá Skaupverjar þó smá hrós fyrir að þora að breyta til en ég bara veit ekki hvort Skaupið eigi endilega að breytast. Mér finnst það þurfa að höfða til eldra fólks og ég efast um að gamla fólkið okkar hafi endilega hlegið mikið að svona þurrum íslenskum "Fóstbræðra"-húmor. Mér fannst Magnafjölskyldan mjög fyndin, og Nylon og líka krakkarnir sem tóku Magnapillurnar svo þó gætu vakað til að kjósa Magna. Og eitthvað fleira svo sem, þarf að skoða þetta betur. Jæja ég er að horfa á Bubbi byggir með öðru og má ekki vera að þessu bloggi. Étið ekki yfir ykkur!